小河有雨

吃过之年夜饭，大年初一春节是全国人民共同格节日。过脱春节，接下来就是正月十五格元宵节着，勒浪元宵节里，苏州人有过元宵“吃园子，闹花灯”格习俗。过脱元宵节，接下来就是腻月腻龙抬头着，腻月腻苏州人要吃撑腰糕，据说吃之撑腰糕一年里就可以腰不酸背不痛。到之三月里，苏州人“谷雨三朝看牡丹”，正好勒浪春风里出门赏花去哉。到之四月十四，本来勒嗨苏州吴趋坊里个轧神仙活动，现在搬到之老阊门附近的南浩街上格神仙庙去哉。轧神仙个格日之搭，苏州人一大半都轰到之南浩街，拿格条本来就不算阔的街轧得了路也走不连牵，从光是轧勒浪人堆里跟之人群慢慢交朝前一步一步格玛过去。再接下来搁日脚就是五月端午裹粽子着，五月端午裹粽子的风俗，现在勒嗨周边的农村里还保留勒嗨，城里人自家屋里裹粽子吃格越来越少着，一来是会裹粽子格老人一个个年纪勒浪大上去着，年轻人大多数材不会裹粽子格，腻来么现在个生活节奏吖快之不少，年轻人也没有心思去学那夯裹粽子着。端午节除脱裹粽子么还有“赛龙船”格活动。到之七月半，勒嗨虎丘山有个庙会，大家可以去白相相看看闹孟个，再下来中秋节到着，八月半到宝带桥可以“桥洞里厢看月亮”，一看就是五十腻个桥洞里，倒映之月亮一大串，真格好看得不得了。看脱宝带桥个月亮，八月十八游石湖，同样也是苏州一个蛮有名气的民俗赏月活动。再下来，九月九，重阳节，旺（读阳）山登高看日出。过脱重阳，格么就要等过冬至着。苏州有句老话，叫冬至大如年，冬至节，摆只供台请过老祖宗，一家门团团员员坐下来，冬酿酒吃吃，随便啥个讲讲，老底之还有什罡一句老古话了叫之：“有得吃么吃一夜，呒拨吃么冻一夜”。有种人家吃完之冬至夜饭么，一家门还要弄脱桌麻将了啥个，大家开开心心个白相相加聚一聚。等到冬至节过脱，哪么又要等之过年哉。一年又一年，就什罡轮回复始个过之下去。